Korpi għas-soluzzjoni tat-tilwim barra mill-qorti skont l-Att dwar is-Servizzi Diġitali (DSA)

L-utenti jistgħu jikkontestaw deċiżjonijiet ta’ moderazzjoni minn pjattaformi online li jirrestrinġu l-kontijiet tagħhom jew jissanzjonaw il-kontenut tagħhom b’diversi modi. Dan id-dritt japplika wkoll għal avviżi ta’ kontenut illegali li ġew irrifjutati mill-pjattaforma. Skont id-DSA, l-utenti jistgħu jappellaw permezz tas-sistema interna tat-trattament tal-ilmenti tal-pjattaformi. Il-pjattaformi huma meħtieġa jirrieżaminaw minnufih id-deċiżjonijiet tagħhom.

Madankollu, id-DSA jagħti wkoll lill-utenti d-dritt li jirrikorru għal korpi għas-soluzzjoni tat-tilwim barra mill-qorti (ODS), jekk jaħsbu li deċiżjoni minn pjattaforma online kienet żbaljata. Lista ta’ korpi ċċertifikati għas-soluzzjoni barra mill-qorti u d-dettalji tagħhom hija disponibbli fit-tabella fil-qiegħ tal-paġna.

Dawn il-korpi huma alternattiva għall-proċedimenti ġudizzjarji li joffru mod aktar rapidu u kosteffettiv għas-soluzzjoni tat-tilwim. Barra minn hekk, l-utenti jistgħu dejjem jieħdu l-kwistjoni quddiem il-qrati nazzjonali tagħhom.

L-utenti jistgħu jagħżlu kwalunkwe entità li tkun ġiet iċċertifikata bħala korp għas-soluzzjoni tat-tilwim fl-UE għat-tip ta’ tilwima tagħhom u jitolbu rieżami ta’ deċiżjoni ta’ moderazzjoni tal-kontenut ta’ pjattaforma.

Għall-utent, is-soluzzjoni tat-tilwim normalment tkun disponibbli mingħajr ħlas jew bi prezz baxx. Jekk il-korp isolvi t-tilwima favur l-utent, il-pjattaforma online għandha ġġorr it-tariffi kollha. L-utenti għandhom dejjem jirrevedu l-informazzjoni dwar it-tariffi applikabbli fuq is-sit web tal-korp rispettiv qabel ma jippreżentaw talba għas-soluzzjoni tat-tilwim.

Il-korpi għas-soluzzjoni tat-tilwim ma għandhomx is-setgħa li jimponu soluzzjoni vinkolanti tat-tilwima fuq il-partijiet, iżda l-pjattaformi u l-utenti huma meħtieġa jinvolvu ruħhom magħhom in bona fide.

L-organizzazzjonijiet li jixtiequ jsiru korp għas-soluzzjoni tat-tilwim jeħtieġ li jippreżentaw applikazzjoni ma' awtorità nazzjonali taċ-ċertifikazzjoni -, il-Koordinatur tas-Servizzi Diġitali (DSC) tal-pajjiż ta' stabbiliment tagħhom.

Id-DSCs huma responsabbli għas-sorveljanza tal-implimentazzjoni tad-DSA fil-pajjiż rispettiv tagħhom, inklużi l-korpi għas-soluzzjoni tat-tilwim. Iċ-ċertifikazzjoni hija valida għal massimu ta’ ħames snin u tista’ tiġġedded. Il-korpi ċċertifikati jridu jżommu ċerti kundizzjonijiet:

• Imparzjalità u indipendenza: Il-korp għas-soluzzjoni tat-tilwim irid ikun imparzjali u indipendenti (inkluż finanzjarjament) mill-fornituri tal-pjattaformi online u mir-riċevituri tas-servizzi, bħal individwi li jkunu ressqu lment.
• Għarfien espert: Il-korp jeħtieġ li jkollu għarfien espert f'qasam partikolari wieħed jew aktar ta' kontenut illegali jew fl-applikazzjoni u l-infurzar tat-termini u l-kundizzjonijiet ta' tip wieħed jew aktar ta' pjattaforma online.
• Remunerazzjoni: Il-membri tal-korp jitħallsu b’mod li jkun indipendenti mill-eżitu tal-proċedura.
• Aċċessibbiltà: Is-soluzzjoni tat-tilwim barra mill-qorti trid tkun faċilment aċċessibbli, u tippermetti s-sottomissjoni ta’ lment u dokumenti ta’ sostenn online.
• Effiċjenza: Il-korp għandu jkun jista’ jsolvi t-tilwim b’mod rapidu, effiċjenti u kosteffettiv u f’mill-inqas waħda mil-lingwi uffiċjali tal-UE.
• Regoli ta' proċedura: Il-korp irid jopera f’konformità ma’ regoli ta’ proċedura ċari u ġusti li jkunu faċilment u pubblikament disponibbli u jikkonformaw mal-liġi applikabbli.

Organizzazzjonijiet ibbażati fl-UE biss jistgħu jiġu ċċertifikati bħala korpi għas-soluzzjoni tat-tilwim. Dan jiżgura li joperaw fi ħdan il-qafas regolatorju tal-UE, u b’hekk jikkontribwixxu għal approċċ armonizzat fis-soluzzjoni ta’ tilwim dwar il-moderazzjoni tal-kontenut. Iċ-ċertifikazzjoni hija valida fis-27 Stat Membru kollha tal-UE.

Madankollu, ċertifikazzjoni tista' tkun limitata għal ċerti oqsma ta' għarfien espert (tipi partikolari ta' kontenut illegali jew tipi partikolari ta' pjattaformi online) jew ċerti lingwi li bihom il-korp ikun kapaċi jsolvi t-tilwim.

Trasparenza u obbligu ta' rendikont

Il-korpi għas-soluzzjoni tat-tilwim jipprovdu lill-awtoritajiet nazzjonali taċ-ċertifikazzjoni tagħhom rapporti annwali dwar il-ħidma tagħhom. Min-naħa tagħha, kull awtorità nazzjonali tirrapporta darba kull sentejn dwar il-funzjonament tal-korpi kollha għas-soluzzjoni tat-tilwim li tkun iċċertifikat. Dawn ir-rapporti fihom informazzjoni dwar l-għadd ta’ tilwim, l-eżiti tiegħu, iż-żmien meħud biex jissolva t-tilwim, id-diffikultajiet li nqalgħu, l-aħjar prattiki u r-rakkomandazzjonijiet biex jittejjeb il-funzjonament tas-sistema għas-soluzzjoni tat-tilwim.

L-awtorità nazzjonali li tkun iċċertifikat korp għas-soluzzjoni tat-tilwim għandha d-dritt li tirrevoka dik iċ-ċertifikazzjoni, jekk tiddetermina li l-korp ma jkunx għadu jissodisfa l-kundizzjonijiet meħtieġa.

It-tabella fiha informazzjoni pprovduta mill-awtoritajiet nazzjonali dwar iċ-ċertifikazzjoni tal-korpi għas-soluzzjoni tat-tilwim, inklużi l-oqsma ta’ għarfien espert tagħhom u l-kopertura tal-lingwi. Aktar informazzjoni dwar il-funzjonament u l-ambitu tal-operat tagħhom hija disponibbli fuq is-siti web tagħhom u fir-regoli ta’ proċedura tagħhom. Jekk għandek aktar mistoqsijiet dwar iċ-ċertifikazzjoni ta’ korp speċifiku, tista’ tikkuntattja lill-awtorità ta’ ċertifikazzjoni rilevanti. Il-lista u s-siti web tal-awtoritajiet nazzjonali jistgħu jinstabu fuq il-paġna ddedikata lill-Koordinaturi tas-Servizzi Diġitali.