Comhlachtaí um réiteach díospóidí lasmuigh den chúirt faoin nGníomh um Sheirbhísí Digiteacha (DSA)

Is féidir le húsáideoirí cur in aghaidh cinntí modhnóireachta ó ardáin ar líne a chuireann srian lena gcuntais nó a chuireann smachtbhannaí ar a n-inneachar ar bhealaí éagsúla. Tá feidhm ag an gceart sin freisin maidir le fógraí faoi ábhar neamhdhleathach ar dhiúltaigh an t-ardán dóibh. De réir an Ghnímh um Sheirbhísí Digiteacha, féadfaidh úsáideoirí achomharc a dhéanamh trí chóras inmheánach na n-ardán chun déileáil le gearáin. Ceanglaítear ar ardáin athbhreithniú a dhéanamh go pras ar a gcinntí.

Mar sin féin, tugann an Gníomh um Sheirbhísí Digiteacha an ceart d’úsáideoirí dul i muinín comhlachtaí um réiteach díospóidí lasmuigh den chúirt, má cheapann siad go raibh cinneadh ó ardán ar líne mícheart. Tá liosta de chomhlachtaí deimhnithe um shocraíocht lasmuigh den chúirt agus a gcuid sonraí ar fáil sa tábla ag bun an leathanaigh.

Is rogha mhalartach iad na comhlachtaí sin ar imeachtaí breithiúnacha lena gcuirtear bealach níos tapúla agus níos costéifeachtaí ar fáil chun díospóidí a réiteach. Thairis sin, féadfaidh úsáideoirí an t-ábhar a thabhairt os comhair a gcúirteanna náisiúnta i gcónaí.

Féadfaidh úsáideoirí aon eintiteas atá deimhnithe mar chomhlacht um réiteach díospóidí san Aontas a roghnú dá gcineál díospóide agus athbhreithniú ar chinneadh modhnóireachta inneachair ardáin a iarraidh.

I gcás an úsáideora, is gnách go mbeidh réiteach díospóidí ar fáil saor in aisce nó ar chostas íseal. Má shocraíonn an comhlacht an díospóid i bhfabhar an úsáideora, íocfaidh an t-ardán ar líne na táillí go léir. Ba cheart d’úsáideoirí athbhreithniú a dhéanamh i gcónaí ar fhaisnéis maidir leis na táillí is infheidhme ar shuíomh gréasáin an chomhlachta faoi seach sula dtaiscfidh siad iarraidh ar réiteach díospóidí.

Níl sé de chumhacht ag comhlachtaí um réiteach díospóidí réiteach ceangailteach ar an díospóid a fhorchur ar na páirtithe, ach ceanglaítear ar ardáin agus ar úsáideoirí dul i dteagmháil leo de mheon macánta.

Ní mór d’eagraíochtaí ar mian leo a bheith ina gcomhlacht um réiteach díospóidí iarratas a chur isteach le húdarás deimhniúcháin náisiúnta - Comhordaitheoir Seirbhísí Digiteacha (DSC) a dtíre bunaíochta.

Tá na DSCanna freagrach as maoirseacht a dhéanamh ar chur chun feidhme DSA ina dtír féin, lena n-áirítear comhlachtaí um réiteach díospóidí. Tá an deimhniú bailí ar feadh cúig bliana ar a mhéad agus is féidir é a athnuachan. Ní mór do chomhlachtaí deimhnithe coinníollacha áirithe a chomhlíonadh:

• Neamhchlaontacht agus neamhspleáchas: Ní mór don chomhlacht um réiteach díospóidí a bheith neamhchlaonta agus neamhspleách (lena n-áirítear ó thaobh airgeadais de) ar sholáthraithe ardán ar líne agus ar fhaighteoirí na seirbhíse, amhail daoine aonair a bhfuil gearán curtha isteach acu.
• Saineolas: Ní mór saineolas a bheith ag an gcomhlacht i réimse amháin nó níos mó d’ábhar neamhdhleathach nó i gcur i bhfeidhm agus forfheidhmiú téarmaí agus coinníollacha de chineál amháin ardáin ar líne nó níos mó.
• Luach saothair: Tugtar luach saothair do chomhaltaí an chomhlachta ar bhealach atá neamhspleách ar thoradh an nós imeachta.
• Inrochtaineacht: Ní mór rochtain éasca a bheith ar réiteach díospóidí lasmuigh den chúirt, rud a fhágann gur féidir gearán agus doiciméid tacaíochta a chur isteach ar líne.
• Éifeachtúlacht: Ba cheart don chomhlacht a bheith in ann díospóidí a réiteach ar bhealach tapa, éifeachtúil agus costéifeachtach agus i gceann amháin ar a laghad de theangacha oifigiúla an Aontais.
• Rialacha nós imeachta: Ní mór don chomhlacht oibriú i gcomhréir le rialacha nós imeachta soiléire agus cothroma atá ar fáil go héasca agus go poiblí agus a chomhlíonann an dlí is infheidhme.

Ní féidir ach eagraíochtaí atá bunaithe san Aontas a dheimhniú mar chomhlachtaí um réiteach díospóidí. Áirithítear leis sin go n-oibríonn siad laistigh de chreat rialála an Aontais, rud a rannchuidíonn le cur chuige comhchuibhithe maidir le díospóidí modhnóireachta inneachair a réiteach. Tá an deimhniú bailí ar fud gach ceann de 27 mBallstát an Aontais.

Mar sin féin, is féidir deimhniú a theorannú do réimsí áirithe saineolais (cineálacha áirithe ábhair neamhdhleathaigh nó cineálacha áirithe ardán ar líne) nó do theangacha áirithe ina bhfuil an comhlacht in ann díospóidí a réiteach.

Trédhearcacht agus cuntasacht

Cuireann comhlachtaí um réiteach díospóidí tuarascálacha bliantúla ar a gcuid oibre ar fáil dá n-údaráis deimhniúcháin náisiúnta. Dá réir sin, tuairiscíonn gach údarás náisiúnta uair amháin gach 2 bhliain ar fheidhmiú na gcomhlachtaí uile um réiteach díospóidí a dheimhnigh sé. Tá faisnéis sna tuarascálacha sin maidir le líon na ndíospóidí, a dtorthaí, an t-am a thóg sé na díospóidí a réiteach, deacrachtaí, dea-chleachtais agus moltaí chun feidhmiú an chórais um réiteach díospóidí a fheabhsú.

Tá sé de cheart ag an údarás náisiúnta a dheimhnigh comhlacht um réiteach díospóidí an deimhniú sin a chúlghairm, má chinneann sé nach gcomhlíonann an comhlacht na coinníollacha is gá a thuilleadh.

Sa tábla tá faisnéis a chuir na húdaráis náisiúnta ar fáil maidir le deimhniú comhlachtaí um réiteach díospóidí, lena n-áirítear a réimsí saineolais agus cumhdach teangacha. Tá tuilleadh faisnéise maidir lena bhfeidhmiú agus lena raon feidhme oibríochta ar fáil ar a suíomhanna gréasáin agus ina rialacha nós imeachta. Má tá tuilleadh ceisteanna agat faoi dheimhniú comhlachta ar leith, is féidir leat teagmháil a dhéanamh leis an údarás deimhniúcháin ábhartha. Tá liosta agus suíomhanna gréasáin na n-údarás náisiúnta le fáil ar an leathanach atá tiomnaithe do Chomhordaitheoirí Seirbhísí Digiteacha.